Up huyden den 25en september 1568 compareerde in de Wijncooperscappel voer dijckgraeff ende hooghe heemraeden van de lande van Zwindrecht Kaerl van Eynde voor hem selven ende Jan van Malsen uuyten naem ende van weeghen mr. Dirck van der Kerck als voicht van 't onmondighe weeskindt van wijlen joncker Willem van Mourkercken saliger, versouckende dat mijnen heeren voers. hemluyden zouden willen gunnen dat zij haren dijck leggende op joncker Fransz. acker dit toecomende jaer negen ende tsestich zouden moegen maecken ende daervoer strijcken eenen steenen muyer. Ende dat na de kuere die dijckgraeff ende heemraden ordineren sullen. Mits dat zijluyden dit jaer zoude moegen volstaen van de kuere bij dijckgrave ende hooge heemraeden opten zelven dijck geordineert den 10ten september laestleden, mits reparerende d'zelve dijck nae den eyssche van den wercke tot preservatie van 't landt.
Gehoirt welck versouck hebben dijckgraeff ende heemraeden geconsenteert, haerlien versouck ende hebben tot dyen eynde gecommitteert Jacop Aertsz. Hencxtman ende Adriaen Woutersz. Vinck als heemraeden die denzelven dijck visiteren sullen ende daerop ordineren als zijluyden bevinden sullen te behoiren. Actum ut supra mij present Co. Matijsz.

Achtervolgende 't versouck ende ordonnantie boven verhaelt zoe hebben wij Jacop Aertsz. Hencxtman ende Adriaen Woutersz. Vinck onsluyden gevonden ten dage ende opten dijcken voers. ende die gekuert als hiernaer volcht:
1. Eerst joncker Willem van Mourkerckens dijck beginnende achter Remmelen huys westwaerts opstreckende tot Kaerl van Eyndens dijck toe; te maecken opte kuere bij dijckgrave ende hooge heemraeden daerop geordineert den 10ten september laestleden.
2. Kaerl van Eyndens dijck hieran volgende totten voers. Mourkerckens dijck toe westwaerts daeran gelegen: sal denselven dijck de cuebe voer hoeft blijven staen ende de vijff cueben opwaerts daeran volgende duergaens opbreecken ende d'zelve opgebroecken zijnde sal men den dijck van 't oosteynde beginnende totten geteyckende willich toe staende in denzelven dijck overspreyen mit goet vierjarich rijs. Ende van den voers. willich aff westwaerts op totten voers. Mourkerckens dijck toe sal men duergaens eenen boss vierjarighe rijs daer inbrenghen ende aldus overspreyt ende eenen boss daerin gebrocht weesende sal men denselven dijck die voers. vijff cueben verneuwen op haer oude kuere mits die oude kueben ende staken neer te slaen ende boven wat in te steken alsdat behoirt nae den eyssche van de wercke.

3. Van Kaerl van Eyndens dijck aff westwaerts opstreckende tot mr. Adriaen Wenssens dijck toe sal die cuebe voer hoeft blijven staen. Ende die vier cueben opwaerts daeran volgende geheel op te breecken ende daernae t'overspreyen duergaens mit vierjarich rijs. Ende 't zelve gedaen zijnde de voers. vier cueben geheel te vernyeuwen op hare oude cuere mits die oude kueben ende staken neer te slaen ende boven wat in te steeken nae den eyssche van den wercke als boven.
4. Van Mourkerckens aff westwaerts op totten willich toe staende in mr. Adriaen Wenssens dijck die geteykent is sal men die twee onderste cueben laeten staen ende die vier cueben opwaerts daeran volgende geheel opbreecken ende eenen nyeuwen boss duergaens daerin brenghen van vierjarich rijs. Ende daernae de voers. vier cueben geheel te vernyeuwen.
5. Voirts van den voers. willich aff westwaerts op tot Adriaen Diericxsz. de Conincxs dijck toe sal men de cuebe voer hoeft verheelen ende nederslaen. Ende de vier cueben daeran volgende opbreecken ende daerna t'overspreyen mit vierjarich rijs. Ende 't zelve gedaen zijnde de voers. vier cueben te vernyeuwen. Ende voirts die oude cueben ende staken neer te slaen ende boven wat in te steeken als dat behoirt nae den eyssche van den wercke. Ende al 't gundt voers. is te maecken op zijne oude keure.

A1 fol. 12 en 12VSO.