Upten 14en junii 1568 is bij Bouduwijn van Drenckwaert als dijckgrave, mr. Adriaen van Bleijenburch, Adriaen Diericxsz. de Coninck ende Jacop Aertsz. Hencxtman met Adriaen Woutersz. Vinck als heemraden van de lande van Zwindrecht in koeren geleyt deese naebeschreven perthijen te beschouwen opte eerste schou weesende den achten dach july toecomende 1568.
1. Van 't nyeuwe huys van De Lueteringe staende buytensdijcxs den dijck te verhooghen tot Jonckkints huys toe eenen halven voet hooger dan de dijcken aen wedereynden zijn. (In de marge:) Opte tweede schouw gepresen.
2. Van de Karnemelcksloot aff tot tegens Remmetgens voerhuys toe den dijck te maecken eenen offleg van anderhalve roede dijckscaeps onder de linde opcomende eenen voet duergaens te verhooghen; ende 14 voeten op zijn lijff blijvende, den uuytercandt waterende over den ondercandt. Ende 't aerdewerck zulcxs opgenomen zijnde, daernae 't oversetten met een goede soede van zes duymen dick wel dijckelixs in 't verbandt geset ende geslooten als dat behoort, (in de marge:) Opte schouwe van deesen bevonden niet voldaen te sijn. Opte tweede schou de 11ten augusti bevonden eenighe van deesen dijck noch ongemaekt te sijn d' welcke den dijckgraeff besteet heeft ende oeck mede eenighe roeden volmaect, daer onder noch geleghen zekere roeden, die Bastiaen Willem Aertz. onderstaen heeft te volmaecken volgende die keure. Den dijck bij den dijckgraeff besteet is opgenomen ende gepresen opten 10ten september 1568. Ende oeck Bastiaen Willem Aertszoens dijck.

3. Van den rijsdijck aff van Adriaen Woutersz. Vinck zuytwaerts opstreckende tot Aerts Dammeszoens dijck toe buytensdijcxs te schieten eenen nyeuwen sloot latende boven van den uuytercandt van den dijck vier roeden. Ende daer en t' eynden te schieten den voirn. nyeuwen sloot van acht voet wijtte, vierdalve voet diep ende vierdalve voet in den bodem blijvende; alle die aerde daeruytcomende aen de dijckzijde op te schieten ende off te effenen ten dijckwaerts houchste. Ende den dijck te verheelen in sijn oude groote als twee roeden afflegs. Ende 't nyeuwe werck te maecken eenen halven voet rijker als 't oude werck, (In de marge:) Opte schouwe van deesen niet voldaen. Ende opte tweede schouw den 11ten augusti geordeelt bij dijckgraeff ende heemraeden dat zij die beschouwen souden op een leech water de selve schouwe hoech water was sulcxs dat men niet volcomelijck zien mocht off 't zelve voldaen was volgende de keure.
4. Pieter van Bruggen dijck ende den paeldijck daeraen volgende duergaens eene voet te verhooghen dattet over die muyer wateren mach. (In de marge:) Opte eerste schouwe gepresen mits dat hij 't zelve noch wat verhogen zoude dat over die muyer wateren moucht ende 't zelve bevonden opte tweede schouwe voldaen te sijn ergo gepresen.
5. Noch van de paeldijck tot Nispens dijck toe buyten eenen offlech te maecken van een roede ende boven twee voet breeder dan hij nu jegenwoirdich is. (In de marge:) Opte eerste schou niet voldaen. Opte tweeden schou wesende de 11ten augustu 1568 is gegundt deesen dijck te maecken mit paelen ende dit opte cuer als daer denselven dijck ancompt. Voer Adriaen Vrancken huys tegens eene stoup aldaer den dijck te verhooghen, eene voet. Ende dat ten lencte van een roede. (In de marge:) Opte eerste schou gepresen.

6. Van Adriaen Corneliszoens huys op Heer Jansdam westwaerts op tot den houck van den berch toe staende buytendijcxs den dijck duergaens eene voet te verhooghen.
7. Van Thonis Jacopszoens huys aff tot aen 't nyeu hoichsel toe den dijck duergaens te verhooghen ende eenen offleg te maecken.
8. Den paeldijck op Heer Jansdam daer die aerde uuytgecalft is wederomme te delven ende die plancken dicht te maecken. Ende met goet blatriet duergaens eene voet te bestetten van den thee van den dijck tot boven toe. Ende daernae wederomme te vullen met goede cleyaerde wol dicht op malcanderen gestampt als dat behoirt.
9. 't Sluysken van de Zijdewy op te graven ende 't houtwerck te vernyeuwen 't gundt men bevinden sal oirbuer te sijn.
10. Van de stoup off geleghen voer pieter Danielsz. tot achter Mariken Karmansdochter toe die gaenwech overal daer hij niet rijbaer en is te maecken thien voeten breet dat hij rijbaar is. Ende dit sullen gehouden weesen te doene een yegelijck voer zijne erve geleghen an de zuytzijde van den dijck.
11. Noch tegen Adriaen Aertszoens huys zoe verre 't zelve strect den wech te maecken als vooren.
12. Noch die steech beginnende van den droogen dijck aff voer Joris Dierixcsz. streckende totte brugge toe de leechten ende slencten te vullen met nyeuwe droige aerde eenen halven voet hooger dan 't aen wederzijden is, midden tonneront. Ende de brugge dicht te maecken sulcxs als dat behoirt.
13. Item soe waer hiervoeren gheen boeten gespecificeert en staen is die eerste reyse op een boete van drie pondt, die tweede reyse op een boete van zes pondt ende de derde reyse op een inrijdende schou.
14. Voirts sal een yegelijck gehouden weesen deese voers. keuren te voldoen ende alle oude keuren van ouden harcomen die hierinne vergeten soude moeghen sijn. Ende dat op alsulcke boeten als daertoe staen. Actum den daghe ende jare als boven.

A1 fol. 3-3VSO.