Wij burgemeesteren, scepen ende raedt der stede van Dordrecht doen condt allen dengeenen die desen onsen oepenen brieve sullen sien ofte hoeren lesen dat alzoe onder andere hoochheden, rechten ende preminentien, die de Co(nincklijcke) M(ajestey)t als grave van Hollandt competeren ende toebehoerende zijn in't landt van Swijndrecht gelegen neffens de voers. stede, bij de voirvaeders van dezelven M(ajestey)t graven ende gravinnen van Hollandt zulck recht gereserveert is, dat als die ambachtsheeren, die binnen denzelfden lande van Swijndrecht ambachtsheerlijcheden hebben, eenen dijckgrave kiessen - 't welck jaerlicx moet geschieden - ende zij t' samen in der electie nyet eens en draghen ofte accorderen, in sulcken gevalle bij de voers. M(ajestey)t ofte van sijn M(ajestey)ts weghen aldaer een dijckgrave gestelt ende gecommitteert werdt, blijckende bij de previlegie daervan zijnde, ende dat die Co(nincklijcke) M(ajestey)t uuyt rechter weetentheyt, authoriteyt ende volle macht voor zijne M(ajestey)t ende zijne Ma(jestei)ts erfven ende naecomelingen, graeven ende gravinnen van Hollandt bij titule van wettelicken ende deuchdelicken beleeninge ende pantschap ons verset, gecedeert ende getransporteert heeft bij zijnde M(ajestey)ts oepene brieven zulcken recht in der electie van den voers. dijckgrave van Swijndrecht als sijne M(ajestey)t daerinne toebehoirt ende competeert om daervan bij ons ende onze naecommers in officie te genyeten ende gebruycken in suiker vuegen ende manieren als zijne Ma(jestey)t 'tzelve gebruyct ende geuseert heeft zoe voers. is, al breeder blijckende bij sijne Ma(jestey)ts oepene brieven daervan sijnde van date den 21en dach van augusto anno 1500 drie ende tzestich lestleden,

soo ees't dat aenschou genomen dat in de jegenwoirdige maent van aprili die ambachtsheeren des voers. landts van Swijndrecht tusschen elcanderen nyet en sijn overdraghen nochte geaccordeert in de electie van de dijcgraeve van Swijndrecht voors. wij hierinne willende voersien ende volcomelijkcken gebruycken 't voirs. recht ons bij de Co(nincklijcke) Ma(jestey)t in der manieren voers. gecedeert ende getransporteert, hebben gecommitteert, gestelt ende geïnstitueert, committeren, stellen ende institueren mitsdesen Bouduwijn van Drenckwaert, die daertoe nut ende bequaem bevonden is, dijcgrave des voers. lants van Swijndrecht om 't zelve dijcgraeffschap bij denzelven Van Drenckwaert voir desen jegenwoirdighen jaere ingaande den elfden deser jegenwoirdiger maent aprilis bedient ende geëxerceert te werden achtervolgende die privilegiën ende hantvesten der voers. stede van Dordrecht ende den lande van Swijndrecht bij den voervaeders der Co(nincklijke) Ma(jestey)t graven ende gravinnen van Hollandt verleent ende gegeven.
Des 't oirconde hebben wij 't segel ten saecken der voers. stede hieronder aen doen hangen opten 15en aprilis anno 1500 vier en tzestich nae paesschen.
(In de marge:) Gelijcke commissie bij mij gemaect opten voirs. Drenckwaert 11 aprillis 1565 stilo curie. Item noch opten 11en aprilis 1568 stilo voers.
Afschrift in Oud-archief van Dordrecht tot 1572 nr. 490 fol. 66 en 66VSO.